- Baixo o lema #SinContaminaciónPorPlásticos, a empresa reduce un 23% o uso de plásticos nos dous últimos anos
- En 2023 aumenta un 30% o uso de plástico reciclado e traballa para lograr o 50%
Tejas Verea, fabricante galego de tellas e solucións eficientes para cubertas, reduciu un 23% o uso de plásticos nos procesos de embalaxe e transporte dos seus produtos nos dous últimos anos, logrando un aforro total de 14 toneladas.
Esta medida combínase coa substitución do plástico por outros materiais de orixe natural e o uso de plástico reciclado. A compañía eliminou o poliestireno expandido ou porexpan nos seus procesos de transporte e exportación substituíndoo por ferros de cartón e aumentou ao 30% o uso de plástico reciclado en 2023, co obxectivo de alcanzar o 50% o próximo ano.
Verea actúa comprometida co medio ambiente, “esforzámonos por ser un referente na nosa industria, demostrando que é posible alcanzar un equilibrio entre a produción eficiente e a protección da contorna natural” explica Luís Verea, CEO de Tejas Verea.
A responsabilidade ambiental é un dos piares da empresa, xunto co investimento en investigación e implementación de melloras en eficiencia e sustentabilidade. Para iso, colabora con empresas expertas en innovación en alternativas sostibles e adaptación de plástico 100% reciclaxe aos seus procesos produtivos e de transporte.
Desde hai anos, Verea implanta accións para cumprir cos Obxectivos de Desenvolvemento Sostible (ODS) para mellorar a sustentabilidade dos seus procesos, investir en innovación e adoptar mellores prácticas de xestión de residuos para contribuír a pechar a ‘billa do plástico’.
Aposta por un uso sostible do plástico e das materias primas
O uso sostible do plástico nun contexto de economía circular é a clave para reducir o seu impacto no medio ambiente e impulsar un crecemento sostible. Tejas Verea aposta por un uso responsable deste material ao mesmo tempo que investiga en materiais alternativos e en procesos que permitan alongar a súa vida útil.
Con respecto á recuperación doutros materiais, Verea conta cun sistema de retorno de pallets de madeira que permitiu recuperar o 47% dos pallets entregados en 2022 aos seus clientes. Tras un proceso de revisión, os pallets reincorpóranse á cadea de embalaxe, reutilizándoos e reducindo o consumo de materias primas.
Tejas Verea
Empresa fabricante de tellas e solucións integrais para cubertas localizada en Mesía (A Coruña) nun complexo industrial de case 300.000 metros cadrados, distribuídos entre 3 liñas de produción con capacidade para fabricar 50 millóns de tellas ao ano, unha planta de moenda preparada para procesar máis de 200.000 toneladas ao ano e dous patios de almacenamento. Fundada en 1967, dá emprego a 65 traballadores.
