Poderán participar obras de nova planta de uso público ou privado e reformas ou rehabilitacións en espazos públicos urbanos, finalizadas entre xaneiro de 2018 e decembro de 2020
Tellas Verea convoca os Premios Internacionais de Arquitectura Cubertas Tellas Verea, en colaboración co Colexio Oficial de Arquitectos de Galicia, co obxectivo de distinguir obras ou solucións máis eficientes e sostibles en cubertas realizadas con tellas cerámicas Verea.
O certame está dirixido a profesionais da arquitectura e nesta primeira edición distinguirá obras finalizadas entre xaneiro de 2018 e decembro de 2020 con cuberta inclinada de tella cerámica. Valorarase positivamente aquelas que fosen instaladas utilizando o Verea System.
Poderán presentar candidatura os profesionais, arquitectos superiores ou técnicos colexiados que desenvolvan a súa actividade por conta propia, en empresas privadas ou en institucións públicas tanto en España como no estranxeiro, así como as sociedades profesionais de arquitectura ou arquitectura técnica.
En canto ás obras, poderán participar as de nova planta de uso público ou privado e reformas ou rehabilitacións en espazos públicos urbanos.
O certame elixirá as dúas mellores de entre todas as presentadas e entregará dous premios diferenciados: un Premio de Obra nova, por valor de 3.000 euros, e un Premio de Rehabilitación, polo mesmo valor.
Os interesados dispoñerán dun prazo límite para a inscrición e presentación da documentación desde hoxe, 13 de abril, ata o venres 17 de setembro de 2021, antes das 24.00 horas. Para realizar a inscrición ou consultar as bases do Premio, habilitouse un apartado específico na web www.tejasverea.com
A tella cerámica, un produto natural
A tella é un produto que nace da natureza, xa que é a combinación de terra, auga, aire e lume. Durante o proceso de fabricación adquire propiedades de durabilidade e illamento térmico que a converten na mellor opción para as cubertas. Ademais, é un produto de economía circular xa que ao final de ciclo de vida pódese reciclar ao 100%.
